Bernhard Edin umborð á trolaranum Vágbingi

Bernhard Edin umborð á trolaranum Vágbingi.

Á myndini er: Bernhard Edin.

Árstal:

Myndina hevur Bygdasavnið fingið frá Bernhard Edin.

Um Bernhard Edin og tilknýtið til Vág og trolaran Vágbing

Í 1966 sigldi sviin Bernhard Edin við einum donskum farmaskipi. Skiparin á farmaskipinum var føroyingur, úr Fuglafirði, og hann fortaldi tá 26 ára gamla Bernt, sum hann vanliga verður nevndur, um Føroyar og fiskiskap við føroyskum skipum.

Hetta skapti áhuga hjá Bernt og einum dana, og á heysti 1966 løgdu teir leiðina til Føroyar at royna eydnuna her.

Teir komu til Havnar og búðu fyrstu vikuna á Sjómansheiminum í Havn. Ein prestur á Sjómansheiminum visti um, at teir ynsktu kjans við fiskiskipi, og fortaldi teimum, at í Vági manglaði teir tveir mans við Havgásini. Teir løgdu síðani leiðina til Vágs og mynstraðu fáar dagar seinni við Havgásini. Skipari var Alfred Holm, sáli.

Bernt bleiv verandi í Vági í meiri enn eitt ár, meðan danin fór aftur til Danmarkar. Í hesum tíðarskeiðinum var Bernt bæði við Havgásini og við Magnus á Gørðunum.

Í 1968 var Bernt heima í Svøríki stóran part av árinum, men sum Bernt sjálvur sigur, so drógu Føroyar og Vágur, og vendi hann tí aftur seint á heysti í 1968. Tá mynstraði hann umborð á trolaranum Vágbingi, fyrst sum dekkari og seinni sum smyrjari.

Meðan Bernt var í landi í Vági, búði hann hjá frøken Jensen á Kafénum, Hannu á Kafénum, men annars fór meginparturin av árinum umborð á Vágbingi.

Vágbingur fiskaði tá bæði við Grønland og New Foundland, einamest tosk, sum varð virkaður til saltfisk umborð. Bernt var við Vágbingi øll árini fram til á sumri 1972, tá Vágbingur gavst sum langfaratrolari. Og tá gekk leiðin hjá Bernt eisini aftur til Svøríki.

Vágbingur til Stockholm
Nøkur ár eftir, at Bernt vendi aftur til Svøríki, keypti eitt felag í Stockholm Vágbing (sum tá æt Bjarnoy), við tí fyri eyga at byggja skipið um til ferðavinnuskip. Skipið varð nevnt Teaterskeppet, og er síðan hetta umbygt fleiri ferðir og siglir í dag við ferðafólki uttan fyri Stockholm, umframt at alskyns tiltøk verða hildin umborð á skipinum, bæði veitslur, ráðstevnur, brúdleyp, dansur og mangt mangt annað.

Tilknýtið til skipið, sum var “heimið” hjá Bernt í umleið 4 ár, hevur Bernt ongantíð mist. Tá hann í 1990 fylti 50 ár, var føðingardagsveitslan hildin umborð á Vágbingi / Teaterskeppet. Sonur Bernt helt brúðarveitsluna umborð og dóttirin, sum er sangarinna, hevur eisini havt framførslur umborð á Vágbingi.